FEFO

FeFo vuoruha sherpatráhppáid

Hámmerfeastta ja dan birrasa tuvrasearvi "Hammerfest og Omegn Turlag" oažžu 300 000 ruvnno Tyventráhppá huksemii Hámmerfestii, ja Finnmárkku olgoáibmoráđđi Finnmark friluftsråd oažžu 200 000 ruvnno Sherpatráhppá huksemii Báhccavutnii FeFo Giisá doarjjaortnegis.

Mii oaččuimet 13 buori ohcamuša vuođđostruktuvraprošeavttaide Finnmárkkus, ja lea buorre oaidnit ná olu áŋgirvuođa ja initiatiivva. Tyventráhppá Hámmerfeasttas ja Sherpatráhppá Báhcavuonas deive buoremusat dan ektui makkár prošeavttaid mii áigut vuoruhit dán jagi, dadjá FeFo stivrajođiheaddji Máret Guhttor i FeFo.

Giisá lea ortnet mas leat čieža doarjjaortnega. Oktiibuot lea doppe 2,1 miljovnna ruvnno dán jagi. 500 000 ruvnno galgá mannat vuođđostruktuvrraide. 

Mii vuoruhit bistevaš vuođđostruktuvrra mii veahkkin buorida orrunmiela, álbmotdearvvašvuođa ja árvoháhkama. Dasa lassin lea áibbas guovddážis ahte ohcciin leat buot lobit ortnegis, muitala Guhttor ja čujuha dasa ahte Davvinjárggatráhppá oaččui miljovnna seamma ortnegis diibmá.

Dalle lei ortnegis 4,2 miljovnna ruvnno, deattuha vel.

Njeaiddánfanas ja girjeprošeakta "Kongeskjøtene i Alta"

FeFo-stivra lea maid válljen doarjut guokte prošeavtta Finnmárkkulága-oasis.

Dearvvašvuođasearvi "Nasjonalforeningen for folkehelse Neiden helselag" lea ožžon 198 000 ruvnno hukset Njeaiddánfatnasa, ja Álttá historjásearvvi girjeprošeakta "Kongeskjøtene i Alta" lea ožžon 200 000 ruvnno.

Mii atnit árvvus dan ahte lea báikkálaš searvi mas lea dát prošeakta mii veahkkin lokte nuortasámi kultuvrra dan bokte go ođđasis ráhkadit Njeaiddánfatnasa.

Mii leat maid ilus dainna go Álttá rikkis historjá šaddá ain eanet ollis go historjásearvi áŋgiruššá sihke dáčča, sámi ja kvena historjjá ovddas, dadjá stivrajođiheaddji Máret Guhttor.

Njeaiddánfanas-prošeakta galgá hukset kopiija Njeaiddánfatnasis, ovtta fatnasa mielde maid okta guovlluolmmoš lea ráhkadan 1962:s, ja vel ovtta fanasviesu fatnasiid vurkkodeami váste.

Gonagaseananoamastanduođaštusat sisttisdollet vuđolaš dieđuid Álttá dállo- ja sohkahistorjjá birra, ja dat lea boarraseamos ja stuorimus báikenammagáldu.

FeFo hálddaša Finnmárkku bivddu, guolásteami ja eatnamiid. Badjebáza galgá mannat servodatávkkálaš prošeavttaide Finnmárkkus.