FEFO

Makkár bivdoguovllu ožžot?

Geahča vuorbádanlisttus geat besset ealgabivdui 2022:as

Várrelistu

155 ohcciidjoavkku šaddet várrelistui. Dat leat 4 eanet joavkku go diibmá. Ovcci jagi áigi lei várrelistu guhkit go goassege ovdal, dalle ledje olles 216 bivdojoavkku várrelisttus vuorbádeami maŋŋel.

Dál leat 5 bivdoguovllu rahpasat:

  • Guovlu 1 - Gulgo 2. periode(*) Bearalváhkis
  • Guovlu 24 - Guohcoaivi (*) Kárášjogas 
  • Guovlu 5 - Lebesby (*) Davvesiidas
  • Guovlu 1 - Langfjorddalen-Torskefjorddalen (*) Gáŋgaviikas
  • Guovlu 17 - Goškesvággi/Lille Molvik(*) Deanus                                               

Bivdojoavkkuin mat leat bajemusas várrelisttus leat buorit vejolašvuođat oažžut bivdoguovlluid mat eai leat vuos juolluduvvon, dahje maid eará bivdojoavkkut eai leat váldán vuostá. Sullii miessemánu 20. b. rájes álget rabas bivdoguovllut fállojuvvot bivdojoavkkuide várrelisttus. Jus báhcet rabas guovllut dan maŋŋel, de fállojuvvojit dat dan várrelistui mii lea báhcán sullii suoidnemánu 20. beaivvi.

Bivdojođiheaddjit várrelisttus ožžot e-boasttas dieđu galládin sii leat listtus.

Dán jagáš ealgavuorbádeapmi

Vuorbádeami maŋŋel fállojuvvo 288 bivdojovkui bivdoguovlu. 104:s sis leat ožžon dan maid sávve vuosttažin dahje nubbin. Jus dasa lassin lohká dan maid sávve goalmmádin ja njealjádin, de leat 145 joavkku mat besset leat hui duhtavaččat.

Personsuodjalusa dihte almmuhuvvojit dušše daid bivdojođiheddjiid namat geat leat ožžon bivdoguovllu.

Bivdofálaldaga sádden

Buohkat, geat ožžot bivddu, dohkkehit dahje hilgot bivdofálaldaga Storviltportalenis. Bivdofálaldagat sáddejuvvojit miessemánu 9. b. rájes. Bivdojođiheaddji oažžu dieđu SMS:a ja e-boastta bokte go bivdofálaldat lea sáddejuvvon.

Guorranbeatnagiid dárkkisteapmi

Vuorbádeami ovdal leat FeFo ja Finnmárkku Ealgabeanasearvi dárkkistan guorranbeatnagiid mat ledje čállojuvvon ealgabivdoohcamušaide. 15 dárkkisteamis Kárášjogas, Guovdageainnus, Mátta-Várjjagis ja Deanus eai gávdnon spiehkasteamit.

- Go bivdojoavkkuin galgá leat beana dalle go ohcet, de lea dat mielde ráddjeme ealgabivdoohcamušaid. Seammás jáhkkit mii ahte dat gáibádus movttiidahttá eambbosiid hárjehallat ja dohkkehit iežaset ealgabeatnagiid. Mađi eanet buorit guorranbeatnagat leat, dađi buoret! Nu dadjá Kristin Hornset, FeFo meahccehálddašeaddji. Son čujuha lágas nannejuvvon gáibádussii ahte galgá leat guorranbeana ealgabivddus:

- Vel buoremusat ge sáhttet ribáhit bážasin mannat, ja de lea čeahpes guorranbeana buoremus veahkki guorrat lápmahuvvan ealli vai beassá báhčit dan nu jođánit go vejolaš. Das lea sáhka humána bivddus, čilge Hornset.

Gieddedárkkistankursa

FeFo lágida kurssa sarvvabierggu gieddedárkkisteamis Guovdageainnus miessemánu 18. ja 19. beivviid, Álttás miessemánu 20. beaivvi ja Vuonnabađas miessemánu 21. beaivvi. Kursa lágiduvvo ovttas Vuovdedoalu kursainstituhtain ja Biebmobearráigeahčuin. Kurssa ulbmil lea oahpahit gieddedárkkisteddjiid geain lea formála gelbbolašvuohta dohkkehit bierggu vuovdima váste. Loga eanet kurssa birra ja dieđit mielde dáppe.

Fáktá dán jagáš ealgabivdoohcamušaid birra

  • 293 bivdofálaldaga ledje almmuhuvvon dán jagi. Daid lassin bohtet vel guokte bivdoguovllu mat leat várrejuvvon oahpahallanbivdui.
  • 443 ohcciidjoavkku devde ohcamušeavttuid. Dat lea 5 eanet go diibmá, muhto mealgat unnit go muhtun jagiid áigi (488 ohcamuša 2013:s).
  • 2295 bivdi leat registrerejuvvon ohcciidjoavkkuide. Dat lea 56 unnit bivdi go diibmá.
  • Gaskamearalaččat leat juohke ohcciidjoavkkus 5,2 bivdi. Gaskamearri lea leamašan badjelaš 5 bivdi juohke joavkku nammii daid maŋemus jagiid. 2013:s ledje gaskamearalaččat «dušše» 4,6 bivdi.
  • 13 proseantta bivdiin leat nissonolbmot, mii lea mearkkašahtti eanet go riikkagaskamearis mas 8,4 proseantta ealgabivdiin leat nissonolbmot.
  • Ovtta bivdojoavkkus ledje 127 vuoruheami ohcamušas, ja okta eará joavku ges ozai dušše ovtta guvlui.
  • Bivdoguovlu, masa eanemus joavkkut ohce, lei guovlu 5 – Váljohka Kárášjogas (203 ohcamuša). Eará bivnnuhit guovllut ledje:
    • Guovlu 7 – Sávkadas Kárášjogas (179 ohcamuša)
    • Guovlu 39 - Levsse Deanus (174 ohcamuša)
    • Guovlu 35 - Lákšjohka Deanus (163 ohcamuša)
    • Guovlu 6 - Gollevárri Deanus (161 ohcamuša)

Geahča visot bivdoguovlluid kárttas.

                                                                                                 

Váldde oktavuoda

Anders Aarthun Ims
meahccehálddašeaddji
E-poasta
Telefovdna 78 95 50 00
Mobiltelefovdna 977 64 667