Ođđahuksen:
Láigolaš ferte váldit oktavuođa gielddain, mii lea plána – ja hukseneiseváldi, iskat lea go ohcangeatnegasvuohta plánejuvvon doaimmaide, ovdal go álgá hukset.
Regulerenplána:
Regulerenplána gávnnat gieldda neahttasiidduin, dahje go válddat oktavuođa gielddain.
Stuoridit bartta/hukset eambbo visttiid/visttiid sturrodat:
Regulerenplána njuolggadusat mearridit galle ja man stuora visttii lea lobálaš hukset du láigosadjái. Ohcangeatnegasvuođa doaimmaid galgá gielda mii lea plána- ja hukseneiseváldi dohkkehit.
Láigohuksensadji:
Astoáiggebarta láigolaš Finnmárkkuopmodagas oažžu lobi geavahit gitta 1000 m2 jus eará ii leat šiehtaduvvon. Láigohuksensajis eai leat teknihkalaččat mihtut, eai ge ráját, muhto láigolaš hálde lunddolaš ráddjejuvvon guovllu vistti/visttiid birra.
Ráđđenvuoigatvuohta:
Láigolaččas leat seamma vuoigatvuođat go eaiggádis eananláigolága § 16 vuođul. Vuoigatvuođat leat gáržžiduvvon dasa mii lea šiehtaduvvon láigokontrávttas ja gustojuvvon njuolggadusmearrádusain (omd. plána- ja huksenláhka, regulerenplána jnv.)
Gáivu/čáhci/septihkka/el-rávdnji:
Jus doaibma lea du láigoeatnama siskkobealde, ja čuovvu gustovaš regulerenplána, de ii leat dárbu ohcat lobi FeFo:s. Muhto fuomášuhtte ahte don fertet gielddas, mii lea plána- ja hukseneiseváldi ja nuoskkidaneiseváldi, ohcat lobi.
Jus doaimmat leat olggobealde iežat láigohuksensaji, fertet sáddet ohcama FeFo:i.
Áiddit:
Váldonjuolggadus lea ahte ii leat lohpi áidut astoáiggebartasajiid Finnmárkkuopmodagas. FeFo sáhttá addit lobi jus leat erenoamáš ákkat ohcamis.
Luodda:
Jus áiggut Finnmárkkuopmodahkii ráhkadit luotta, fertet FeFo:s ja gielddas, mii lea plána- ja hukseneiseváldi, ohcat lobi. Ohcamuša galggat sáddet FeFo:i.
Dasa lassin fertet ohcat lobi luoddaeiseválddiin (gielddas jus lea gieldda luodda dahje Stáhta geaidodoaimmahat jus lea fylkka- dahje eurohpaluodda) ráhkadit eretvuodjinluotta.
FeFo lea mielas ásahit luottaid regulerejuvvon bartaguovlluide, jus lea gustovaš gieldda plánaiguin.
Luoddasearvi:
Buohkat geat bartaguovlluin geavahit priváhta luotta dahje parkerensaji, leat miellahtut luoddasearvvis luoddalága §§ 54 ja 55 vuođul.
FeFo ávžžuha vuođđudit luoddasearvvi jus luottas leat máŋga geavaheaddji, luoddaláhka § 55 goalmmát lađđasa.
Murren:
Don it dárbbaš FeFo:s ohcat lobi murret láigohuksensajis, muhto fuomášuhtte ahte murren lea maid eará lágaid bokte regulerejuvvon, omd. ránnjálága bokte.
Sirdit/vuovdit:
FeFo ferte dohkkehit buot láigošiehtadusaid sirdimiid/vuovdimiid. Jus áiggut vuovdit barta mii lea láigohuksensajis fertet deavdit eanaoamastanduođaštusa ja sáddet dan FeFo:i vuolláičállit. FeFo sádde eanaoamastanduođaštusa Kártadoaimmahahkii diggelogahallamii.
Eanaláigodivat:
Don gii láigohat mávssat jahkásaččat láigodivada. Rehket boahtá guovvamánus/njukčamánus juohke jagi.
Jus háliidat lohkat eambbo lágaid birra, geahča lovdata.no