Go bivdu loahpahuvvui ledje 699 ealgga báhččon, juohkásan ná; 226 sarvvá, 66 ráves gusa, 96 nuorra gusa, 92 njiŋŋelasa ja 219 miesit. Dán jagi njeaidinlogut leat eanet go diibmá, go dalle báhče dušše 652 ealli. Mii fertet mannat ruovttoluotta 2020:i gávdnat stuorát njeaidinlogu go dán jagi, goas njeide 701 ealli. Muhto dán jagáš njeadinlohku lea mealgat vuollelis go bajimuš jagi 2012:s, goas njeidejuvvo 846 ealli.  

Maiddái dán jagi sáhtte bivdojoavkkut mat báhče misiid main njuovvandeaddu lei vuollel 50 kilo oažžut ođđa bivdokoartta mii vástida dan koartta mii addojuvvui miesis. Juogaduvvojedje 32 dákkár buhtaduskoartta, lassáneapmi diimmá ektui. Ortnet galgá movttiidahttit njuovvat smávva misiid mat dávjá eai birge nu bures dálvet ja dávjá eai laskka. Ortnet árvvoštallojuvvo dán dálvvi ja šaddá fáddán máddodatplánačoahkkimiin.

Bivdostáhtus - buot njeidimat bivdoguovlluid mielde

Bivdomihtut

Ovdal bivddu biddjojuvvojit nu gohčoduvvon bivdomihtut, mihttolohku lea galle ealgga mii háliidit báhčit, juohke oassemáddodahkii. Dán jagi lei ollislaš báhčinlohku 678 ealgga, ja 699 báhččon ealggain šattai boađus guhkkin badjel mihttomeari. Dát soaitá čujuhit ahte mihttomearit leat biddjon veha vuollegaččat ja máddodat muhtin guovlluin lea eanet go leat vuordan.  

Áicon ealga ja boahtte jagi earit

Dálvvi mielde galget jahkásaš máddodatplánačoahkkimat dollojuvvot. Máddodatplánačoahkkimiidda čoahkkanit FeFo, suohkanat, báikkálaš joavkkut ja searvvit ja eará berošteaddjit ráhkadit báhčinplána ja eriid boahttevaš jagiide. Máddodatplánabargui adnojuvvo áicon ealga logut, ja buot bivdojoavkkut ávžžuhuvvojit buktit sisa áicon ealggaid dán jagáš bivddus nu johtilit go vejolaš.

Loga ealga máddodatplánaid.