Dohkkehan ođasmahttema
Stivra ii lean duhtavaš vuosttaš fasádaevttohusain. Danne ráhkadedje ođđa tevnnega Verte arkiteavttain Álttás. Dán háve ledje tevdnegat sin miela mielde. Dál lea stivra dohkkehan ođasmahttima, mii dáhpáhuvvá reviderejuvvon fasádatevnegiid mielde.
Mihttomearrin lea leamaš oažžut vistti eambbo oidnosii gávpotmáilmmis, seammás go lea čielga oktavuohta váldokantuvrii Leavnnjas. Arkiteavttat leat viežžan inspirašuvnna Finnmárkku luonddus – sihke materiálaválljemis ja hámiin mat speadjalastet guovssahasa ja jogaid lihkadusaid.
Ođđa fasáda addá vissui nannoseabbo identitehta, mas leat elemeanttat mat muittuhit váldokantuvrra, muhto heivehuvvon Čáhcesullo erenoamáš iešvuhtii ja birrasii.
Báikkálaš materiálat ja resurssat
Fasádačovdosa leat Verte arkiteavttat Álttás hábmen. Mats Hus AS lea váldoentreprenøra, ja máŋga báikkálaš vuolleentreprenøra Čáhcesullos leat searvan bargui. FeFo lea maid geahčadeamen vejolašvuođa geavahit dimbbára maid leat viežžan mehciin Finnmárkkus – mii sihke addá vistái nannoseabbo báikkálaš čanastumi ja heive min ceavzilvuođastrategiijai.
Áŋgiruššan adda aktivitehta báikkálaš fitnodagaide ja árvoháhkamii guovllus. Álttá arkiteakta, Deanu entreprenevra, bargit miehtá Finnmárkku ja ollu Čáhcesullo fitnodagat leat mielde, de manná praktihkalaččat olles investeren birrasii 35 miljovnna ruovttoluotta Finnmárkui. Dasa mii leat hui ilus – ja juoga maid mii leat aktiivvalaččat bargan olahit.
Kantuvra boahtteáigái
Bargu ođđa visttiin lea juo bures jođus. Mihttomearri lea ođđaáigásaš ja doaibmi kantuvra mii doaibmá bures sihke odne ja boahtteáiggis. Ođđa fasádatevnnegat galget fargga
meannuduvvot Čáhcesullo suohkanis, ja sii geat dán rádjai leat oaidnán daid, jáhkket ahte visti šaddá bures oidnosis gávpotguovddážis. Jus buot manná plána mielde, de mii sáhttit fárret ođđa lanjaide 2026 čávčča.
Visti Tollbugatas šaddá eanet go dušše bargobáikin, muhto viessu šaddá maid symbolan dasa maid FeFo ovddasta: fuolahit oktasaš opmodagas, láhčit bargosajiid Finnmárkkus ja hukset dan luonddu ja kultuvrra ala maid mii buohkat juogadit.