Ollugat serve čoahkkimii, ja eanaš Finnmárkku suohkanat ledje ovddastuvvon sátnejođiheddjiin, suohkanhoavdan dahje goappašagain.

20 jagi historjjás ovttasbarggu ovddosguvlui

Ovddeš opmodathoavda Sverre Pavel rabai fágaprográmma historjjálaš geahčastagain Finnmárkkuopmodaga ásaheapmái ja ovdáneapmái 20 jagi čađa.

Son válddii earret eará ovdan vuordámušaid dasa maid mii sáhttit ja galgat dahkat, ja movt dat eai álo dávis dan rievttálaš doaibmamunnái mii mis duohtavuođas lea eanaeaiggádin. Dat lei buorre vuolggasadji ollu digaštallamiidda mat čuvvo.
 

Oassin 20-jagi ávvudeamis fitne maiddái vihtta nuorra čuojaheaddji Álttá skuvlakorpsas konferánssas. Korpsa válljejuvvui GRUNN til å satse ávvujagi áŋggirdeami bokte ja oaččui 20 000 ruvnno viidásat bargui.

Konkrehta fáttát adde buori ságastallama 

Areálaplánen lei okta dain surggiin mat bohciidahtte ollu ságastallama. Konkrehta ovdamearkkaid bokte geahčaimet movt gielddat ja mii deaivvadit plánaproseassain, mii doaibmá bures ja movt ovttasbarggu sáhtášii buoridit. Fáttát ledje earret eará muddenplánat, areáladárbu ja man dehálaš lea árrat gulahallat gaskaneaset.

Maiddái nuoskkideapmi ja čorgen Finnmárkkuopmodagas digaštallojuvvui. Suohkaniin ja mis leat iešguđet rollat ja váikkuhangaskaoamit, muhto mis lea oktasaš beroštupmi gávdnat buriid čovdosiid go dat geas lea ovddasvástádus ii leat šat doaimmas dahje ii leat oahpis.

Movt badjebáza Finnmárkkuopmodagas galgá boahtit buorrin Finnmárkui, lei garra digaštallan. Doppe bohte ollu cealkámušat maid stivra galgá váldit mielde viidáset mearrádusproseassain. Máŋggas namuhedje Giisa-ortnegiid positiiva áššin maid lea dehálaš joatkit.

Láigoheapmi lei eará fáddá mii bohciidahtii ságastallama ja buvttii stivrii máŋga konkrehtalaš rávvaga viidásat bargui.

Fápmu, vuoigatvuođat ja meahcceávkkástallan 

Nuppi beaivvi álggahii Svein Grotli Skogen NVE:s muitalit fápmohuksema stáhtusa birra Finnmárkkus ja viidáset konsešuvdnaproseassaid birra.

Mii muitaleimmet viidáseappot Finnmárkku Kraft ovttasbarggu birra, áidnavuoigatvuođaid šiehtadusaid duogáža birra ja maid dat mearkkašit. Maiddái dás bohte ollu jearaldagat ja árvalusat gielddain.

Riektekártema ja Kárášjoga-ášši oassi 2 birra lei stuora beroštumi. 

Go mii humaimet meahccehálddašeami birra, de čájeheimmet earret eará movt buoret máhtolašvuohta bivdoguovlluin dahká vejolažžan muddet bivdindeattu dárkilit ja addá buoret vuođu guoddevaš hálddašeapmái.

Konferánsa loahpahuvvui logaldallamiin maid Trygve Kolderup doalai. Son lea fitnodagas SPOR, mii bargá Visit Alta ovddas. Fáddán lei movt buorre láhčin sáhttá váikkuhit johtaleami stivremii ja luonddu noađuheami unnideapmái.

Deaivvadanbáiki maid mii áigut hukset viidáseappot

Guokte beaivvi čađa ledje ollu gažaldagat, cealkámušat ja konkrehta digaštallamat. Ii lean dárbu leat ovttaoaivilis buot áššiin - iige dat lean ulbmilge.

Mii hálddašat Finnmárkkuopmodaga, muhto ollu dan barggus mii dahkat ovttas gielddaiguin. Danne lea deaŧalaš ahte leat čoahkkananbáikkit gos mii sáhttit juogadit máhtu, buorebut ipmirdit guhtet guoibmámet rollaid ja ságastallat sihke vejolašvuođaid ja hástalusaid birra.

GRUNNlag for samarbeid lei buorre álgu - ja deaivvadanbáiki maid mii háliidit hukset viidáseappot.