Mii FeFo:s dahje min láigoheaddjit (láigohannjuolggadusaid vuođul) hálddašit luossajogaid beaivválaččat Finnmárkkus. Jogahálddašeddjiid bargu lea ráhkadit guolástanreguleremiid mat muddejit guollebivddu. Go ásahuvvojit dahje rievdaduvvojit guolástannjuolggadusat mat mielddisbuktet beassanregulerema, de galgá dat sáddejuvvot gulaskuddamii Finnmárkolága § 27 mielde. Beassanreguleren čađahuvvo máddodateavttuid vuođul dahje go bivdindeaddu ja gáržžohallan gáibida dan.

Gulaskuddanskovi gávnnat dáppe.

Gulaskuddamat leat viiddis ja áddjás proseassat. Go jurddaša ahte luossamáddodagat leat negatiivvalaččat ovdánan, de lea ágga jáhkkit ahte báikkálaš guolástannjuolggadusat rivdet jagiin mat bohtet. Dat sáhttá vuolggahit ollu gulaskuddanproseassaid. Vai eat šatta čađahit gulaskuddamiid juohke áidna oktavuođas, de mii evttohit ásahit "reaidokássa" mas leat dat eanemus geavahuvvon beassanregulerendoaibmabijut. Doaibmabijut maid mii ovttasráđiid min láigoheddiguin sáhttit váldit atnui.

Mii sávvat ahte dii muitalehpet maid dii oaivvildat dáid reaidduid birra. Gulaskuddanskovi gávnnat dáppe, ja áigemearri lea guovvamánu 25 b.

Negatiiva ovdáneapmi ja luossa rukseslisttus

Leat sullii 70 anadroma čázádaga Finnmárkkuopmodagas. Eanas čazádagaid leat báikkálaš searvvit ja joavkkut mat láigohit ja hálddašit, ja FeFo hálddaša muhtin.

Min jogaid luossamáddodagain lea maŋimuš jagiid leamaš heajos nálleovdaneapmi, ja luossa lea dál áitojuvvon. Valljodagaid áimmahuššama dihte sáhttá šaddat dárbu muddet bivddu.