Gulaskuddan lei dan birra makkár njuolggadusaid sáhttá bidjat johtui sihkkarastin dihtii guollenáliid min čazadagain.
Dát ledje evttohusat gulaskuddamis
Gulaskuddamis bivddiimet cealkámušaid čuovvovaš vejolaš doaibmabijuid birra:
- Beaive eriid ja/dahje áigodat eriid álggaheapmi ja heiveheapmi
- Luosa, guvžžá ja vallasa bivdoáiggi gáržžideapmi, dálá njuolggadusaid rámmaid siskkobealde
- Ráddjehusat rusttegiid geavaheapmái
- Čázadagaid juohkin guovlluide, ja dálá guovlluid heiveheapmi
- Suodjalanguovlluid ásaheapmi
- Ráddjehus beaivekoarttaid logu ektui
- Mávssuid álggaheapmi guolástannjuolggadusaid rihkkumiid ovddas, ja maiddái gaskaboddosaš gildosiid duođalaš rihkkumiid ovddas
Ollu positiiva cealkámušat
Gulaskuddan oaččui stuorra doarjaga. Oktiibuot vástidedje 35 priváhta olbmo. Dain ásse 25 Finnmárkkus ja 10 olggobealde Finnmárkku. Dasa lassin oaččuimet vástádusaid 11 joavkkus, searvvis ja fitnodagain.
Buot evttohuvvon doaibmabijut mat ledje gulaskuddamis ožžo doarjaga vástideaddjiin. Bohte maid máŋga čálalaš cealkámuša. Dát, ovttas gulaskuddama vástádusaiguin, leat čohkkejuvvon sierra dárkilis čoahkkáigeassun (persovdnasuodjalusa dihte vástádusat leat anonymiserejuvvon).
Viidáset proseassa
Jus láigoheaddjiit háliidit bidjat johtui beassanbearráigeahččandoaibmabijuid dahje mávssuid guolástannjuolggadusaid rihkkumiid ovddas, de ferte dat ain čielggaduvvot minguin. Rievdadus ovddeš geavadis lea ahte sierra, individuála gulaskuddamat eai leat šat dárbbašlaččat juohke báikkálaš evttohussii.
Mii váldit buot máhcahagaid vuhtii min viidáset barggus, ja giitit buohkaid geat válde áiggi searvat gulaskuddamii.