Kárášjoga ášši galgá meannuduvvot Alimusrievttis guovvamánu 29. b. - njukčamánu 11. b.. Jus Alimusriekti doalaha Meahcceduopmostuolu duomu, de ii leat FeFo šat eanaeaiggát Kárášjogas. 

- Jus meahcceduopmostuolu duopmu bissu, de ii leat mis šat ealgabivdu fállun Kárášjogas. Mii galgat leat vuordevaš eanaeaiggádat ja hálddašit ávkin olles Finnmárkku ássiide. Sihkkarastin dihtii ahte ealgabivddu almmuheapmi ja geassin jagi 2024 várás dáhpáhuvvá dakkár vugiin ahte mii eat fála eambbo go dan maid mii sáhttit lohpidit, ja seammás dakkár vugiin mii sihkkarastá vuoiggalaš juogadeami geavaheddjiid gaskka, de vuordit mii Finnmárkkuopmodaga ealgabivddu almmuhemiin dassa maŋŋel go Alimusriekti lea cealkán duomu, lohká FeFo meahcceossodaga jođiheaddji, Einar J. Asbjørnsen. 

Maŋimuš 15 jagis lea juohke njealját ealga Finnmárkkus báhččojuvvon Kárášjoga gielddas. Man ollu ealggaid leat goddán jagis Kárášjogas lea rievdan gaskkal eanemus logu 245:s gitta 120:i dan maŋimuš jagi.  Dat dahká Kárášjoga Finnmárkku deaŧaleamos ealgabivdogieldan ovttas Deanuin. Jus Kárášjohka biddjo olggobeallái Finnmárkkuopmodaga, de gáržžiduvvo FeFo fálaldat Finnmárkku stuorrafuođđobivdiide mearkkašahtti.

Dássážii lea ealgabivdu Kárášjogas leamaš hui bivnnut máŋgga Finnmárkku bivdosearvvis. Bivdofálaldagat Kárášjogas, mat leat leamaš rabas buohkaide ohcat, leat leamaš eanemus ohccojuvvon bivdofálaldagat ovddit jagiid. Jahkásaččat leat measta bealli ohccijoavkkuin (gaskal 150 ja 200 joavkku) ohcan dain eanemus bivnnuhis guovlluide.  

Geassundoaluin ealgabivdofálaldagaid oktavuođas lea guhkes historjá ja leat bivnnuhis lágideamit báikkálaš servviide miehtá Finnmárkku. Dál fertejit searvvit vuordit ovdal go sáhtet lágidit doaluid. 

-Ealgabivdu lea dehálaš dáhpáhus min bivdiide ja mii šállošit go šaddát maŋidit almmuheami dán jagi. Dalán go duopmu lea celkojuvvon de mii almmuhit dieđuid dán jagáš ealgabivddu birra, bivdofálaldagain Kárášjogas dahje ii, loahpaha Asbjørnsen.