Ášši vulggii go Juvvin-Lemeha maŋisboahtit gáibidedje eanaoamastanrievtti 1,3 dekára eatnamii nuorttabealde Rávdojoga gos sis lea goahti.

Geassemánus dohkkehii meahcceduopmostuollu maŋisboahttiid gáibádusa go sii leat árbevirolaččat geavahan guovllu.

Finnmárkolága bokte lea FeFo geatnegahttán čuovvulit buot eanagáibádus áššiid ja šaddá vuostebealli dikkis. Árvvoštallamis galgá nationála riekti leat vuođus.

Stivrra liigečoahkkimis čakčamánu 5 b. mearridii stivra njeallje guovtti jiena vuosttá guoddalit meahcceduopmostuolu duomu Alimusriektái.

Sivva dasa lea eahpádus lea go duopmu riekta juridihkalaš vuođul, ja go ášši addá stuora váikkuhusaid meahccegeavaheddjiide ja boazodollui, oaivvildii eanetlohku.

Doaibmi stivrrajođiheaddji Kurt Pasvikbamsen Wikan čilge:

Ášši addá vejolašvuođa privatiseret Finnmárkulaččaid oktasaš meahci, ja mii dárbbašit dasa prinsihpalaš čielggadeami. Finnmárkkus leat sullii 500 goađi. Ii ovttasge leat priváhta eanan.

Jus rahppojuvvo privatiseret buot daid eatnamiid, de dat váikkuha sihke doaimmaid ja investerema meahcis. Dat ii leat boazodoalu dahje earáid beroštumis.

Son ipmirda ahte ášši lea noađđin maŋisboahttiide, ja deattuha ahte sii eahpitkeahttá leat goađi oamasteaddjit.

- Danne leat mii fállan hálbbes eananláigošiehtadusa.  Dat suddje maŋisboahttiid juridihkalaččat viessosadjeláigolága vuođul. Obbalaččat mii háliidit eananláigošiehtadusaid gođiide, ja mis lea guhkesáigásaš jurdda.  Min vásáhus lea ahte goađit mat eai geavahuvvo dahje bajásdollojuvvo billašuvvet. Goahti manná dalle ruovttoluotta lundui. Muhto jus eanan lea priváhta, de lea eanan das agibeaivve ja sáhttá hehttet guovllu geavaheami agibeaivái. Dat ii oro riekta min maŋisboahttiide. Danne háliidit mii Alimusrievtti čielggadeami áššis, loahpaha Wikan.