FeFo lea otne, nu mo ovdal dieđihuvvon, bovden buot Leavnnjajoga eanaeaiggádiid álgočoahkkimii geatnegasorganiserema birra. Leavnnjajogas leat sihke eanabihttát gos lea priváhta bivdoriekti ja oasit mat gullet Finnmárkkuopmodahkii (FeFo-eana). Dán rádjai lea Leavnnja eanaoamastansearvi (LGF) lihttoláigohan FeFo oasi Leavnnjajogas.
- Guovtteoaivilvuođat Leavnnjajoga hálddašeamis, mannan luossabivddu áigodagas, čájehit ahte lea dárbu ođđa hálddašanvuohkái, lohká FeFo meahcceossodaga jođiheaddji, Einar J. Asbjørnsen.
Otná guollebivddu hálddašeapmi Leavnnjajogas ii čuovo njuolggadusaid mat leat fámus 2013 jagi rájes. Muhto eiseválddit leat diktán hálddašeaddjiid bargat nu guhká go gaskaneaset soabadit hálddašeami ektui.
- Dainna ulbmiliin ahte láhčit buoremus dili, ja gievrudan dihtii Finnmárkku ássiid rivttiid luossabivdui. Ja seammás Finnmárkolága mielde mii álggahit barggu heivehan dihtii hálddašeami lobálašvuođa hárrái, lohká Asbjørnsen.
Ulbmil geatnegashálddašeamis lea ásahit oktasaš hálddašanorgána, mas livčče mielde ovddasteaddjit geain leat luossabivdorievttit Leavnnjajogas.
Várrehus eretcealkit lihttoláigošiehtadusa
Seammá áiggi sáddii FeFo dieđu Leavnnja eanaoamasteaddjisearvvi (LGF) stivrii ahte eana/johkaláigošiehtadus árvvoštallo botkejuvvot, dan sivas go leat rihkkumat. Earret eará lea eahpesihkarvuohta lea go hálddašeapmi Finnmárkolága njuolggadusaid mielde, namalassii § 26. Dan paragráfa mielde FeFo:s lea riekti juohkit geavahanrivttiid báikkálaš servviide, logi jahkái, mas ulbmil lea oktasaš bivdu ja eará sullasaš meahccedoaimmat Finnmárkkuopmogasa (FL § 26)
- Mis leat máŋga lihttoláigošiehtadusa Finnmárkkus, ja šiehtadusat leat priváhtarievttálaš šiehtadusat min ja sin gaskkas. Sihke mii ja searvvit mat lihttoláigohit finnmárkulaččaid oktasaš eatnama, fertet čuovvut Finnmárkkulága. Dát mearkkaša earret eará ahte ferte gulastit ovdal go regulere, ja geavaheaddjit sáhttet váidit. Mii leat ráhkadan sierra lihttoláigonjuolggadusaid jogaide, láidestussan lihttoláigoheddjiide. Earret eará čuožžu čielgasit ahte lihttoláigoheaddjit leat geatnegahttán čuovvut FeFo gohččumiid , dadjá Asbjørnsen.
Mii leat bovden olles LGF stivrra čoahkkimii digaštallat ášši. Čoahkkin dollo lagamus áiggis.
- Min vuolggasadji jogaid hálddašanáššis Finnmárkkus lea álki: Mii galgat hálddašit buoremus lági mielde olbmuid váste geat orrot dáppe ja gieldda ássiin leat eanemus rievttit resurssaide. Dat guoska maid FeFo eatnamii Leavnnjajogas, loahpaha Asbjørnsen.
LGF láigošiehtadusa eretcealkin várrehus ii leat čanus Leavnnjajoga dahje eará jogaid geatnegasorganiseremii.