Dán jagáš ealgabivdu almmuhuvvo easkka dalle go Alimusrievtti duopmu Kárášjoga áššis lea celkojuvvon.  

- Mii galgat leat einnostahtti eanaeaiggádat ja hálddašit ávkin buot Finnmárkku ássiide. Sihkkarastin dihtii ahte 2024 ealgabivddu almmuheapmi ja geassin dáhpáhuvvá dakkár vugiin ahte mii eat fála eambbo go dan maid mii sáhttit lohpidit, ja seammás dakkár vugiin mii sihkkarastá govttolaš juogu geavaheddjiid gaskka, de vuordit danin ealgabivddu almmuhemiin Finnmárkkuopmodagas dassá go Alimusriekti lea cealkán duomu, lohká FeFo meahcceossodaga jođiheaddji, Einar J. Asbjørnsen.  

Ii leat gal vel sihkar goas duopmu lea gárvvis, muhto mii diehtit dál juo ahte dán jagi maŋŋonit almmuheamit ovddit jagiid ektui.  

- Dalán go duopmu lea celkojuvvon de mii almmuhit dieđuid dán jagáš ealgabivddu birra, ja lea go mis fálaldat Kárášjogas vai ii, loahpaha Asbjørnsen.  

Dušše logi beaivásaš ohcanáigodat

Vai almmuhus ja geassin ii maŋŋonivčče eambbo go dárbbašlaš, de leat mii ožžon sávaldagaid oanidit ohcanáiggi. Ovdal lea ohcanáigi leamaš guokte golbma vahku, muhto dán jagi mii oanidat ohcanáigemeari logi beaivái.  

Go ohcanáigodat oatnu, de mii almmuhit dán jagi eriid ja násteguovlluid dál, nu ahte dii sáhttibehtet ráhkkanahttit ohcanlisttu. Earit ja násteguovllut Kárášjogas leat maid biddjojuvvon, dainna eavttuin maid Alimusriekti mearrida.  

Gáibádus ahte guorranbeana ja beanaeaiggát galgaba ássat Finnmárkkus  

Ođas dán jahkái lea dat ahte bivdojoavkkuid guorranbeana ja beanaeaiggát galgaba ássat Finnmárkkus. Gáibádus lei gulaskuddamis dálvet 2022-2023, ja mearriduvvui diibmá, muhto álggahuvvo easkka dán jagi. Gáibádus mielddisbuktá ahte sihke guorranbeana ja beanaeaiggát geat leaba mielde bivdojoavkku ealgabivdoohcamis, galgaba ássat Finnmárkkus ollašuhttin dihtii min gáibádusaid. Ássangáibádusas ii addojuvvo sierralohpi.  

Bivdoguovllut, bivdoearit, násteguovllut ja bivdoáigi 2024. (PDF, 212 kB)